En Farum
Melodio: Tagiĝo
En Farum - vilaĝo proksime al lag'
kaj verda arbaro abia -
ĉi tie mi vivas ja tagon post tag'
en domo sur voj' idilia.
Pri nia urbeto rakontos mi nun,
dum kiam tra pluvo briladas la sun'.

Jes - Farum situas kviete sen pomp'
en verda insulo Selando.
La arboj verdiĝas - kaj sen interromp'
birdetoj kantadas ĉe rando
de l' densa heĝaro - ĉe marblua ond',
Edeno ĝi estas en tuta la mond'.

Sur strato kaj vojo de nia vilaĝ'
ne bruas la densa trafiko,
sed tamen bruegas dum tiu ĉi tag'
maŝinoj de l' pipo-fabriko.
Tre gaje sonadas ĉe vojo la kant'
per kiu amuzas sin fremda vagant'.

---