Unu el la pioniroj en la dana esperantomovado S. K. Nielsen en Fredericia preterpasis la 70-an datrevenon por sia naskiĝo la 4-an de aprilo (1975).
Li naskiĝis en Egeskov apud Fredericia, kie li pasigis siajn infanjarojn. Li studis en Jonstrup seminario, kaj post fina ekzameno tie li revenis al Fredericia, kie li ekhavis postenon kiel instruisto en komunuma lernejo, - laboro, kiun li prizorgis ĝis 1974, kiam li pensiiĝis. La lernantoj ŝatis lin pro lia
bonhumoro kaj pro lia varia kaj interesa instruado.
Dum pli ol 40 jaroj S. K. Nielsen estas aktiva esperantisto. Li instruis la lingvon en vesperlernejo, kaj je ekzamenoj li estis cenzoro. Li faris multajn prelegvojaĝojn, dum kiuj li klopodis vigligi la kluban vivon, kaj en 1934 li mem fondis klubon en Fredericia, kies prezidanto li ankoraŭ estas. Sub lia gvido la nombro de membroj kreskis ĝis pli ol 70.
S. K. Nielsen ĉiam estis dinamika persono, kaj post la milito li startis turisman oficejon por aranĝi aŭtobusvojaĝojn, kiujn li dum ferioj mem gvidis tra tuta
Eŭropo. Kiam la aŭtobuso atingis vizitindan urbon, li ofte prizorgis, ke loka esperantisto kunveturu tra la urbo kiel gvidanton. S. K. do tradukis liajn esperantlingvajn klarigojn por la multaj ne-esperantistoj en la grupo, kaj
tiel li faris bonan propagandon por la lingvo.
Pro ĉiuj liaj laboroj por esperanto li hodiaŭ estas honora membro de DEA.
Li havas multajn en- kaj eksterlandajn geamikojn, kaj ili certe kune kun ni deziras al li ĉion bonan dum venontaj jaroj.
Koran gratulon!
Fredericiano
