1)
En Bjalystok, en malproksima lando
kreiĝis antaŭ jaroj Esperanto,
studento la plej bona el pola junular'
alcelis interpacon per lingvo de fratar'.
------Zamenhof, granda la genio,
------Zamenhof, patro del' ideo,
---------Zamenhof.

Kaj la ideo flamon ekbruligis,
kaj kamaradoj ĉirkaŭ li flankiĝis;
kuraĝe, forte staris la juna batalar'
formante la unuan, fervoran lernantar',
------Gloro al la bonaj pioniroj,
------gloro al laboremaj viroj,
---------koran dank'.

2)
Dum kvindek jaroj Esperanto vivis en la mond',
majeste, forte marŝis ĝi ĉirkaŭ la tera rond',
jes nian patrolandon eĉ fine trovis ĝi,
:/: kaj nun dum tridek jaroj adeptoj restis ni. :\:

Per vorto kaj per plumo alvokis ĉiam ni,
kaj ĉiuj ni ja kantis la saman melodi',
sed al oreloj surdaj predikis ofte ni,
:/: ĉar Esperanton oni nomis nuran utopi. :\:

Sed sur la vasta tero kaj kiel bela flor'
la lingvo tamen kreskis per bona samlabor',
fidelaj pioniroj, heroa junular'
:/: fariĝas man' en mano kuraĝa batalar'. :\:

Ĉar levu ni standardon al alta blua ĉiel',
kaj sur la ĉielo brilu la verda, klara stel',
kaj vivu Esperanto, la lingvo de fratar',
:/: jes vivu Esperanto, la fama "Jubilar". :\: